Բազմաթիվ վնասված ծառեր Գրիգոր Լուսավորիչ փողոցում

2025 թվականի սեպտեմբերին Գրիգոր Լուսավորիչ 4/2 հասցեի հարևանությամբ՝ որտեղ կառուցվում են «Միլանո» և «Ֆիրենզե» բնակելի համալիրները, իրականացվում էին կոյուղու խողովակների փոխարինման աշխատանքներ։ Արձանագրվել է, որ պեղումների ժամանակ 9 ծառի արմատային համակարգը ծանր վնասվել է՝ արմատների կեսը ուղղակի կտրել-հեռացրել են։ Տեղի բնակիչներից մեկը հենց աշխատանքների ընթացքում նկարահանել է տեսանյութ և արել լուսանկարներ՝ ֆիքսելով ծառերին հասցված վնասը։

Սեպտեմբերի 29-ին դիմումներ են ուղարկվել Ոստիկանություն և Շրջակա միջավայրի նախարարություն։ Նամակն ուղարկվել է e-request.am հարթակով՝ օգտագործելով այս ձևանմուշը (ռուսերեն), առանց թվային ստորագրության։

Հոկտեմբերի 3-ին Նախարարությունից պատասխան է ստացվել։ Նշել են, որ՝ (1) վարչական վարույթ է հարուցվել, (2) տեսուչը «Կանաչապատման» դենդրոլոգ Արսեն Հազարապետյանի հետ այցելել է դեպքի վայր, և (3) եզրակացրել են, որ ծառերի՝ աճը դադարեցնելու աստիճանի վնասված լինելը հնարավոր կլինի պարզել միայն հաջորդ գարնանը՝ երբ (և եթե) դրանք նորից տերևակալեն։ Այդ պատճառով (4) գործի ընթացքը առայժմ կասեցվել է։

Վերադառնալ ցանկին